Ukrayina Baş istihbarat idaresiniñ dronları Orenburgda raketalar içün geliy istisal etken zavodqa ücüm etti. Bu aqta salı künü "RBK-Ukrayina" öz menbalarına esaslanıp bildire.
Beyanatqa köre, ücüm keçken künü aqşam yapılğan. Yerli sakinler zavod civarında patlavlar aqqında bildireler. Saat 20:00 region akimiyeti, Zavodnıñ yerleşken yeri olğan, Federal M-5 "Ural" avtomobil yolunıñ bir qısmını qapattı, dep qayd ete "RBK-Ukrayina".
Orenburg geliy zavodı — Rusiyede yekâne ve Avropada raketalar ve aviatsiya sanayısında qullanılğan geliyni işlep çıqarğan eñ büyük müessiselerden biridir.
Region akimiyeti zavodnıñ zarar körgenini daa tasdıqlamadı. Bazarertesi künü Orenburg vilâyetiniñ gubernator vazifesini eda etken Yevgeniy Solntsev region üzerinde urulıp tüşürilgen eki uçucısız uçaq aqqında bildirdi, amma qoşma tafsilâtlarnı aytmadı. Bundan ğayrı, ekinci kün devamında akimiyet Orenburg ava limanında uçaq seferlerini toqtata, dep bildire "Bi-bi-si" rus hızmeti.
Rusiye Mudafaa nazirligi bildirdi ki, salı kününe keçken gecesi Rusiyeniñ eki regionı üzerinde 25 ukrayin uçucısız uçağı urulıp tüşürildi, olardan çoqusı Rostov vilâyetiniñ territoriyasında, daa üçü Stavropol ülkesinde.
