Moskvanıñ Ekinci Ğarbiy okrugınıñ arbiy mahkemesi, biznes mektebiniñ ocası Eldar Marçenkonı, Kurskta dron qullanılğan teraktta iştirak etkeninde qabaatlap, 16 yıl sert rejimli apis cezasına mahküm etti.
Prokurorlıq 19 yıl sert apis cezasına mahküm etilmesini istedi — bu maddede eñ büyük apis cezası.
Mahkeme, Marçenkonı ukrayin mahsus hızmetleriniñ vazifesine ketirmek içün Moskvadan Kurskqa kelip, "smartfon yardımınen" yerli ava limanınıñ koordinatlarını bergeninde qabaatlı tanıdı. Qabaatlav versiyasına köre, aqaynıñ areketleri neticesinde Ukrayinadan Kurskqa eñ azından eki uçucısız uçaq keldi, olar "öz maqsadına irişip olamadı".
Marçenkonıñ qabaatını isbatlağan delillerden biri olaraq prokuratura hadimi onıñ mitinglerde iştirak etkeni ve "prezidentke qarşı aqaretleyici izaatları" içün memuriy mesüliyetke çekilmesini adlandırdı.
Eldar Marçenko qabaatını tanımadı. Advokatı Natalya Tihonova Taqiqat komitetine oña qarşı qullanılğan işkence aqqında ariza berdi.
